राष्ट्रकवि माधव घिमिरेको निधन (अन्तरवार्ताको भिडियोसहित)

 पाेखरा । राष्ट्रकवि माधवप्रसाद घिमिरेको निधन भएको छ । मङ्गलबार साँझ ५ बजेर ५५ मिनेट जाँदा उनको निधन भएको पारिवारिक स्रोतले जानकारी दिएको हो । छोरा राजीव घिमिरेका अनुसार उनको १०१ वर्षको उमेरमा निधन भएको हो ।

घिमिरेको जन्म वि. सं. १९७६ असोज ७ गते लमजुङ जिल्लाको पुस्तुन गाउँमा भएको थियो । उनलाई स्वच्छन्दतावादी भावधारा र परिष्कारवादी शैली भएका कुशल नेपाली कवि र गीतकारका रुपमा चिनिन्छ । 

उनले बाल्यकालदेखि नेपाली साहित्यका कविता, खण्डकाव्य, गीतिनाटक, कथा, अनुवाद लेख -प्रबन्धजस्ता अनेकौं विधा-उपविधाहरूमा निरन्तर कलम चलाउँदै आएका थिए। उनका नवमञ्जरी (वि.सं. १९९४), घामपानी (वि.सं. २०१०), नयाँ नेपाल (वि.सं. २०१३), किन्‍नर-किन्‍नरी(वि.सं. २०३३) जस्ता कविता सङ्ग्रह सङ्कलित छन्। उनलाई ‘राष्ट कविु को उपाधिले सम्मान गरिएको थियो।

१४ वर्षको उमेरमा ज्ञानपुष्प शीर्षकमा वि.सं.१९९२ मा गोरखापत्रमा पहिलो रचना छपाएर काव्य सिर्जना थालेका थिए। घिमिरे वि.सं. २००५ सालमा गोरखापत्रमै सह-सम्पादकको जागिरे भएका थिए। बनारसबाट शास्त्री प्रथम खण्ड उत्तीर्ण गरेपछि वि.सं. १९९८ सालमा भाषानुवाद परिषद्बाट मासिक २५ रुपैयाँ तलबमा लेखक पदमा काम थालेका थिए। वि.सं. २००१ सालमा गोरखापत्र दैनिकमा मासिक ४० रुपैयाँ तलबमा सहायक सम्पादकमा काम गरे। त्यसपछि २०१० सालमा लक्ष्मीप्रसाद देवकोटाको अध्यक्षतामा गठन भएको काव्य प्रतिष्ठानमा चार वर्षसम्म सदस्य थिए।

सारङ्गी न्युज डटकमबाट साभार

 राष्ट्रकवि माधवप्रसाद घिमिरेसँग सारङ्गी न्युजले गरेकाे कुराकनी । यो कुराकानी घिमिरे भारतमा उपचार गरी फर्कने क्रममा गरिएको हो ।